2 Corinthians 11

1Mi ye fya bwa omi n miyi shi mi daɓo n gye mama. Fye bwa emi n miyi ma daɓo n ko n mi yi fi n bugba. 2Mi n shewo yi lo nfyei, shewo Shekwoyi nya pya, wato of ye ye-ye kwa ze Krisiti nyanu gmanyi. Shi ɓinyinkwoyi gyi-gyi-yi zhin wa sewo ye-ye shi ntu n enu ɓo nu n woye nyi. Oza nwo ɓa zhin owo ɓa. 3Ama mi wo dna lo n vinvin yi, mi-i wodna sakun zaho wa pmi fye awyeya n fye gaiciya ga dna n Dagayi, shi shetan ɓei dna Hawawu kwoce dna n Adini ofwa nyi. 4Fye wu lo ngye fye to mi zhi lon, fyei ga nyaho-nyahoi gaiciya n na gna fye, ko oza woi zhin fye Kristi do n waʼazi gbo ndoyi n yi zhin nyi, ko zafun do ndu Zafun Gyi-gyi-yi nfye ɓei gwo nyi ko ai wu fye zokwo do n fye ɓa pwo, fya gwo ko lo abwa ʼba-ba.

Aza Gyifiyi

5Ama mi tagye lo ngye aza nɓa yi ɓahin ge Shekwoyi atnu-tnuyi nyi, ge ɓa du mi lon. 6Ngye mi ta kpe waʼazi zhin, amma mi kpeɓeye lo n mida, shi mi gye fye ku awyega bwa nsa yi ntuge yi ku wu fye pei-pei.

7Ma zhin ɓenukwoi nu, mi-i gba mihin nfye aba, shi ma zhin fye waʼazi Shekwoyi nabari manayi nya, to ma gna fye ge fye gba nya hon? 8– 9Ama ma gwo a ikklisiya je cauta n ɓa tnu mi n cei, n nabai ma zhin fye tnu-tnu to fye yi gba nyahon. Sa deye ɓei ku zo mikun kwa yami gun, ama to ma nya fye ɓehon, gama a-Yesu-viyi n Makidoniya ɓei ku ɓemi n nyaga yi. Mi to nya fye gyiwye ɓon, mi-i ta shan fye nyan. 10Mi ku alkawali zhin, ngaiciya ga yi n mi ceilo dna n Yesu nyi, nge mi ɓa ku gna aza vinya n Helleni. 11Ntu kniɓehiʼa? Ntu ge mi ta ye fye lon? Shekwoyi kpe lo ge mi ye fye lo. 12Ama, mi ɓa zhin ma zun aza kni n ɓa gma ge ɓa zhin Shekwoyi tnu-tnu nu shi yi zhin nyin.

13Shekwoyi nu to tnu n na aza ye pyayin. Kwo fyewyi, ɓa zhin akataceyi nu, ɓa dnafye kwoce n gye ɓa zhin Kristi atnu-tnu yi. 14Ama ce ta wo mi lon! Shetan zhin wa pmi wohin bma ngye malaika buzangna nya. 15Ntuce nu kwo to zhin oɓe wo-woyi nu, owo abara ɓami ɓa zhin lo nu ce, ɓa ze n gye a tnu-tnuyi, manayi. N navun ɓa ɓa gwo tata doho-dohoyi, nɓa atnu-tnu nukwoyi kunce lo n cei.

16Mi gyi fye wye n jesun, fye to gye ngye mi zhin mama num, ko fyei gye lo nu, fye wo mi ɓeda nabai ma mwa mihin tukwo ngye ɓa. 17Dagayi to ga mi iko ge mi mwa mihin tukwo lo num, ntu ge mi zhin aɓo lo ngye mama nwo ton na pwo yi m. 18Ama aza deye ɓai gyi abye, ɓai gna fye, shi ɓa kpe ɓeye lo nsun, omihin ɓa mwa mihin tukwo. 19– 20(Fye gye ge fye cecei-lo, ama fyei kna a mamahi ɓeda tnubua n bugba buyi, fye ta damu lo, esa ɓa zefye oɓa fyenu, ɓai gwo anya vinya nfye n cei lon, ɓai gyi gyiba tu nfye tukwo, ɓai ci fye wyegba. 21Vinyiko wo mi lo maci ge mi to n kalayi lo n migni yi n lonun, ama enya n ɓa mwa ɓahin tukwo n cei mi ɓami ma mwa mihin tukwo ce.)

22Ɓa ta mwa ɓahin tukwo ge ɓa zhin Ibraniyi nun? Mi zhin kwo nu. Ɓa zhin a Israilayi nu? Mi zhin kwo nu. Ɓa zhin Ibrahim ayawyi nu? Mi zhin kwo nu.

23Ɓai gna ɓa zhin Kristi nu bauta? Ama miku bauta zhin wo ndu ɓa. (Mila zenya nu mi-i gma nsun layi). Miku tnu-tnu zhin n duɓa. Ayi dnami n kurkuku n na bwai mwabegye. A zhin mi bulala n na abwayi mwa begye. Mi sun n fiyi ci-ci. 24A Yahudiyi zhin mi bulala n ɓa knalufin n nukwoyi, shita-cei ciwagmanyi har abwa ngun atnu. 25Abwa ta ai lumi n na abusiyi. A knimi akuta bwa zungmanyi. Abwa ta eya kwoi ɓaya nmiyi, bwa zun gmanyi mi yi dna n ela nsukwoyi vinya n kwo nyipyeyi ɓe. 26Miku zan-zan n na abai mwa kpa, mi-i sin wahala anuwan yako nya. N na a viyi, n ma za akun Yahudiyi n naabyedo yi, miku wahala sin, n na azhi yakwo, n efiyi n bmana n na nuwan yi n na zakun nɓa yi ɓahin ge ɓa zhin Kristi aza. 27A ɓe mi n nayi san yi, n tnagye-wan yi n sukwoyi, nsayi mwa-begye mi lo n mikunyi, nunwa mikunyi, mi-i zan n tna nyagyi, eseyi fumi mi-i vin, n tna aje nɓa bwi miʼse.

28Ndeye avun mi n damuwa yi lolo shi ikklisiya zan-zan lo n wu. 29Nyikadonu bwi aba to mi-i wun bugba n wo ɓon ma? Nkadonu miya to ai wo mi pwa n ge mi bmawo zhin ma? Nkadonu la gbidokunnu n zafun to minagyi yi gyi mi n zayi n wa zhin woi gbidokunnu nyin ma?

30Ama ndei n mi ɓa gma, ma gma n na anyayi nu n ɓa wu emi kalagba. 31Shekwoyi eyi Dagayi Yesu Kristi dada n na ciwo nyalo-nyalo nyi, kpelo ge mi da gaiciya nu. 32Ngye, gwamna n Dimaska, n Esu Aretas yi ɓa gu ezhi ntu ge ɓa wan mi. 33Ama a kamishi n na awunyi dna n katakpa n ebwo nkwoɓei ce n ganuwan nyakun pa, ma lo minya!